Türkmenistanyň DIM-nde Migrasiýa boýunça halkara guramasynyň Merkezi Aziýa boýunça sebitleýin utgaşdyryjysy bilen duşuşyk geçirildi

2025-nji ýylyň 2-nji aprelinde Türkmenistanyň DIM-nde Türkmenistanyň Daşary işler ministri Raşid Meredowyň Migrasiýa boýunça halkara guramasynyň Merkezi Aziýa boýunça sebitleýin utgaşdyryjysy Serhan Aktoprak bilen duşuşygy geçirildi.

Duşuşygyň başynda Türkmenistanyň Daşary işler ministri myhmany täze wezipä bellenmegi bilen gutlady we netijeli hyzmatdaşlygyň dowam etdiriljekdigine umyt bildirdi.

Türkmenistan bilen Migrasiýa boýunça halkara guramasynyň özara gatnaşyklarynyň täze ugurlary babatynda pikir alşyldy, şeýle hem hyzmatdaşlygy mundan beýläk hem giňeltmek üçin bilelikdäki wezipeler kesgitlenildi.

Bosgunlaryň we raýatlygy bolmadyk adamlaryň hukuklaryny üpjün etmek, adam söwdasyna garşy göreşmek bilen bagly meseleler ileri tutulýan ugurlaryň hatarynda kesgitlenildi.

Taraplar migrasiýa dolandyryşy boýunça halkara kadalaryny milli kanunçylyga ornaşdyrmagyň we migrasiýa kanunçylygynyň iş ýüzünde netijeli durmuşa geçirilmeginiň zerurlygyny bellediler.

Duşuşygyň ahyrynda söhbetdeşler hyzmatdaşlygy mundan beýläk-de ösdürmäge gyzyklanma bildirdiler.