Türkmenistanyň Prezidenti Ýaponiýa bilen ynsanperwer gepleşikleriň täze görnüşlerini teklip etdi

Hormatly Prezidentimiz Serdar Berdimuhamedow «Merkezi Aziýa ̶ Ýaponiýa» dialogynyň birinji sammitinde çykyş edip, adam mümkinçiliklerini ösdürmäge we jemgyýetçilik gatnaşyklaryny pugtalandyrmaga aýratyn üns berip, ýaşlar we medeni hyzmatdaşlyk uzak möhletleýin hyzmatdaşlygyň binýady bolup durýandygyny nygtady.

Döwlet Baştutanymyz Türkmenistanyň ýapon medeniýetine we ylmyna gyzyklanma bildirýändigini belledi. Häzirki wagtda türkmen mekdep okuwçylarynyň we talyplarynyň müňlerçesi ýapon dilini öwrenýärler, bu bolsa halklaryň arasynda düşünişmegiň esasy binýadyny döredýär.

«Şunuň bilen baglylykda, ýaşlaryň, talyplaryň we akademiki toparlaryň gatnaşyklaryny üpjün etmek maksady bilen, «Merkezi Aziýa — Ýaponiýa» ýaşlar forumyny döretmek başlangyjy bilen çykyş edýäris» – diýip, döwlet Baştutanymyz aýtdy.

Şeýle hem hormatly Prezidentimiz Serdar Berdimuhamedow Merkezi Aziýanyň - ýaş ilatly we ägirt uly intellektual serişdeli sebit bolup, bilim, ylym, tehnologiýa we ynsanperwer alyş-çalyş ulgamlarynda uly mümkinçiliklere eýedigini hem belledi. Şu nukdaýnazardan, Türkmenistanyň Prezidenti sebitdäki zenanlaryň we Ýaponiýanyň arasyndaky özara gatnaşyklaryň hemişelik mehanizmini döretmegiň başlangyjyny öňe sürdi.

«Şeýle hem «Merkezi Aziýanyň we Ýaponiýanyň zenanlarynyň dialogy» atly hemişelik hereket edýän platformany döretmegi teklip edýäris. Biziň ýurtlarymyzyň zenanlarynyň giň ugurlar boýunça ýakyn hyzmatdaşlygyny ýola goýmak bu teklibiň baş maksadydyr» diýip, Türkmenistanyň Prezidenti teklip etdi.