YLHAM JOŞGUNY: ŞEKILLENDIRIŞ SUNGATY MUZEÝINDE BAÝRAMÇYLYK SERGISI AÇYLDY

Paýtagtyň Şekillendiriş sungaty muzeýinde Türkmenistanyň Konstitusiýasynyň we Baýdak Gününe bagyşlanyp çeper suratlaryň, grafika eserleriniň,  heýkelleriň we amaly-haşam sungatynyň sergisi açyldy.  

Suratkeşleriň her biri bu temanyň çeper beýanyny tapmaga  özüçe  çemeleşipdir.  Türkmen döwletiniň esasy nyşanlary bolan – Baýdagyň hem-de ýurduň Baş kanunynyň her hili röwüşlerde şekillendirilen nusgalary bu serginiň esasy eksponatlarydyr.

 Şu ýyl «Parahatlyk we ynanyşmak ýyly»   şygarynyň dabaralanmagynyň astynda  geçýär. Ol sergide goýlan eserleriň tutuş toplumynda ýurdumyzyň asuda asmanynda erkana gaýmalap  ýören ak kepderileriň  keşbi arkaly  alamatlandyrylýar.

Aýratyn hem  bütin dünýäde parahatçylygyň simwoly hasaplanýan bu guşlaryň skripkada joşgunly saz çalýan  gyzjagazyň daşynda pel-pelläp perwaz urşuny tolgunman synlamak mümkin däl. Göýä diýersiň, sazanda gyz  durmuşyň – ýagtylygynyň, şatlygynyň  we bagtýarlygynyň  simfoniýasyny ýerine ýetirýän ýaly görünýär...   

Baýramçylyk sergisiniň bir esasy temalarynyň biri-de – ýurdumyzyň ýüregi, merjen ak şäher Aşgabatdyr.  Sergidäki suratlaryň birinde täze taslamanyň üstünde işleýän ýaş dizaýnerler görkezilipdir. Olaryň iş otagynyň açyk penjiresinden Aşgabadyň gözel künjekleri  edil eliň aýasynda ýaly görünýär

Olaryň gapdalynda Köpetdagyň etegindäki baýyrlaryň gözüňe  juda mährem görünýän erezlerini suratlandyrylýan  žiwopis eseri goýlupdyr.   Uly ähmiýetli baýramçylygyň beýanatynyň çygrynda görkezilýän dogduk diýaryň gözel keşbi-de döwletimiziň taryhynyň ajaýyp watanperper sahypasydyr.