Awaza BMG-niň Deňze çykalgasy bolmadyk ösüp barýan ýurtlar boýunça üçünji maslahatyny geçirmäge taýýarlyk görýär

Häzirki wagtda Hazar deňziniň türkmen kenarynda ýerleşýän «Awaza» milli syýahatçylyk zolagynda 2025-nji ýylyň 4–8-nji awgusty aralygynda geçiriljek BMG-niň Deňze çykalgasy bolmadyk ösüp barýan ýurtlar boýunça üçünji maslahatyna giň gerimli taýýarlyk işleri alnyp barylýar.

Bäş gün dowam etjek halkara forumyň çäklerinde syýasy-diplomatik, söwda-ykdysady hem-de medeni-ynsanperwer ugurlary öz içine alýan baý mazmunly çäreler meýilleşdirilýär. Forumyň meýilnamasy işewürlik hem-de medeni çäreleri, mowzuklaýyn sergileri we Merkezi Aziýa döwletleriniň medeniýet günlerini öz içine alýar.

Forumyň dowamynda plenar mejlisler, ýokary derejeli bäş sany mowzuklaýyn «tegelek stol» we ýedi sany ýokary derejeli forum geçiriler. Olaryň hatarynda Günorta-Günorta hyzmatdaşlygy boýunça ministrler duşuşygy, parlament forumy, hususy pudagyň forumy, raýat jemgyýetiniň forumy, ýaşlar forumy, zenan ýolbaşçylaryň duşuşygy we aragatnaşyk boýunça çäre bar.

Şeýle hem gatnaşyjy döwletler, halkara guramalar we türkmen tarapy tarapyndan guralýan birnäçe çäreler meýilleşdirilýär. Olar ýerüsti ulag we arabaglanyşyk, Halkara parahatçylyk we ynanyşmak ýyly, ýaşlar syýasaty, durnukly energetika we sirkulýar ykdysadyýet ýaly mowzuklara bagyşlanar.

Parlamentleriň, raýat jemgyýetiniň we ýaşlaryň esasy orny

Parlamentler deňze çykalgasy bolmadyk ösüp barýan ýurtlarda, tranzit ýurtlarynda we hyzmatdaş ýurtlarda syýasaty taýýarlamakda we durmuşa geçirmekde netijeliligi, açyklygy we jogapkärçiligi üpjün etmekde möhüm orun eýeleýärler. Olar deňze çykalgasy bolmadyk ösüp barýan ýurtlar üçin täze iş meýilnamasynyň maksatlaryna ýetmek üçin, şol sanda söwda dolanyşygyny ýönekeýleşdirmek, ykdysady ösüşi we sebit hyzmatdaşlygyny üpjün etmek üçin kanunçylyk binýadyny döretmekde jogapkärdirler.

Raýat jemgyýetiniň orny deňze çykalgasy bolmadyk ösüp barýan ýurtlaryň durnukly ösüşi üçin örän möhümdir. Ýerli başlangyçlardan başlap, halkara DDG-a çenli dürli derejelerde hereket edýän raýat jemgyýeti, ykdysadyýetiň täze strategiýalarynyň öňe çykarylmagynda, deňze çykalgasy bolmadyk ösüp barýan ýurtlaryň ileri tutulýan ugurlarynyň ählumumy syýasy platformalarda beýan edilmeginde möhüm ähmiýete eýedir. Bu köpugurly çemeleşmäniň hem-de iş meýilnamasynyň üstünlikli durmuşa geçirilmeginiň esasy başlangyjydyr.

Deňze çykalgasy bolmadyk ösüp barýan ýurtlaryň ýaşlar forumy ýaşlara dünýä liderlerine öz garaýyşlaryny ýetirmek üçin mümkinçilik berer. Bu bolsa geografik päsgelçilikleri ýeňip geçmek, ykdysady ösüşi höweslendirmek we Durnukly ösüş maksatlaryna ýetmek üçin täze strategiýalary işläp düzmäge kömek eder.

Maslahatyň çäginde geçiriljek çärelerine 32 döwletiň ýolbaşçylarynyň, olaryň hökümetleriniň, şeýle hem BMG agza döwletleriň wekilleriniň, Guramanyň Baş sekretarynyň we onuň orunbasarlarynyň gatnaşmagyna garaşylýar. Mundan başga-da, halkara we sebit guramalarynyň, kanun çykaryjy edaralaryň, maliýe institutlarynyň, jemgyýetçilik birleşikleriniň hem-de hususy pudagyň ýolbaşçylary we wekilleri gatnaşarlar.

Maslahatyň «Awaza» milli syýahatçylyk zolagynda geçirilmegi aýratyn ähmiýete eýedir. Çünki 2025-nji ýyl «Halkara parahatçylyk we ynanyşmak ýyly» diýlip yglan edildi we Türkmenistan özüniň hemişelik Bitaraplygynyň 30 ýyllygyny belleýär. «Awaza» milli syýahatçylyk zolagy netijeli çözgütleri tapmak hem-de hyzmatdaşlygy ýola goýmak üçin meýdança öwrülmegi üçin gönükdirilendir. Onuň maksady deňze çykalgasy bolmadyk ösýän ýurtlara kynçylyklaryny ýeňip geçmäge hem-de öz mümkinçiliklerini doly durmuşa geçirmäge ýardam etmek, şeýlelikde, adalatly we bagtly geljegi üpjün etmekden ybaratdyr.