Türkmenistan bilen Bütindünýä gümrük guramasynyň arasyndaky hyzmatdaşlygy berkitmek üçin möhüm ädim

Türkmenbaşy Halkara deňiz portunda Türkmenistanyň Döwlet gümrük gullugynyň başlygy bilen Bütindünýä gümrük guramasynyň (BGG) Baş sekretary Ýan Sandersiň duşuşygy geçirildi. Duşuşyk Bütindünýä gümrük guramasynyň Baş sekretaryň BMG-niň Deňze çykalgasy bolmadyk ösüp barýan ýurtlar boýunça üçünji maslahatyna gatnaşmagynyň çäginde geçirildi.

Taraplar gümrük dolandyryşy pudagynda häzirki ýagdaýy we hyzmatdaşlygyň geljegini ara alnyp maslahatlaşdylar we gümrük edaralarynyň netijeliligini ýokarlandyrmak boýunça çärelere garadylar. Türkmenistanyň Döwlet gümrük gullugynyň binýadynda işleýän Bütindünýä gümrük guramasynyň Sebitleýin okuw merkeziniň ösdürilmegine we milli gümrük ulgamy üçin ýokary derejeli işgärleri taýýarlamaga aýratyn üns berildi.

Duşuşykdan soň Bütindünýä gümrük guramasynyň Baş sekretary portuň infrastrukturasy we ýükleriň hem-de ýolagçylaryň netijeli gatnawyny üpjün etmek üçin döredilen şertler bilen tanyşdy.

Bu duşuşyk Türkmenistan bilen Bütindünýä gümrük guramasynyň arasyndaky hyzmatdaşlygy pugtalandyrmakda möhüm ädim boldy.