Türkmenistanyň 2026-njy ýyl üçin maliýe-ykdysady ileri tutulýan ugurlary kesgitlenildi

Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň 2026-njy ýyldaky ilkinji mejlisini geçirdi. Maslahatyň esasy mowzuklarynyň biri ýurdumyzyň ykdysadyýet, maliýe we bank toplumynyň 2026-njy ýyl üçin iş meýilnamalary boldy.

Ministrler Kabinetiniň Başlygynyň orunbasary H.Geldimyradow uzak möhletleýin durnuklylygy üpjün etmäge gönükdirilen meýilnamalaryň taslamalaryny hödürledi. Şoňa görä-de, Hökümetiň esasy tagallalary şu aşakdaky ugurlara gönükdiriler: makroykdysady durnuklylyk we sebitleriň okgunly ösüşi, maýa goýum syýasatyny döwrebaplaşdyrmak we telekeçilik üçin özüne çekiji gurşawy döretmek, dolandyryşyň ähli ulgamlaryna sanly tehnologiýalary giňden ornaşdyrmak.

2026-njy ýyl üçin meýilnamalarda raýatlaryň durmuş taýdan goraglylygyna aýratyn üns berildi. Döwlet zähmet gatnaşyklaryny kämilleşdirmegi we ilatyň iş üpjünçilik derejesini ýokarlandyrmak boýunça çäreleri görmegi maksat edinýär. Bu wezipeler Döwlet býujetiniň ýerine ýetirilmegini üpjün etmek hem-de netijeli salgyt-býujet we pul syýasatyny durmuşa geçirmek bilen utgaşykly amala aşyrylar.

Täze ýylda şeýle hem bank we ätiýaçlandyryş ulgamlaryny hil taýdan täzelemek boýunça çäreler toplumy bellenildi. Çäreleri durmuşa geçirmegiň çäklerinde bank we ätiýaçlandyryş hyzmatlarynyň gerimini giňeltmek, halkara maliýe institutlary bilen özara gatnaşyklary işjeňleşdirmek, döwlet emlägine eýelik etmek we ony dolandyrmak işlerini kämilleşdirmek, milli statistika edaralarynyň we standartlaşdyrmak ulgamynyň işini döwrebaplaşdyrmak göz öňünde tutulýar.

Hasabatyň dowamynda bellenilişi ýaly, ykdysadyýetiň häzirki zaman zerurlyklaryna laýyklykda pul bilen üpjünçiligini we karz berilmegini talaba laýyk ýola goýmak, şeýle hem milli kanunçylyk binýadyna öňdebaryjy halkara tejribesini ornaşdyrmak boýunça çäreler meýilleşdirildi.