AŞGABATLYLAR TÜRK KERAMIKAÇYSY IBRAHIM KUŞLUNYŇ ESERLERI BIELN TANYŞÝARLAR

Şekillendiriş sungaty muzeýinde türkiýeli keramikaçy-nakgaş Ibrahim Kuşlunyň işleriniň sergisi açyldy, ony Türkiýäniň Ilçihanasy we Türkmenistanyň Medeniýet ministrligi gurnadylar. Muzeýiň zallarynyň birine farfordan we keramikadan ýasalan ýokary derjeli çeper eserler bezeg berdi. ХIII asyrdan başlap nakgaşyň watanynda giňden ýaýran nepis plaketler häli-häzire çenli myhmanhana otagynyň bezeginde ýörgünlidir. Farfordan ýasalan nagyşly ýalpakgaplar, pyýalalar, mejimeler, grafinler, küýzeler, güldanlar ýaly gap-gaçlaryň nusgalary özüne çekýär.

Bolgariýada doglan Ibrahim Kuşlu 12 ýaşynda maşgalasy bilen ata Watanyna – Türkiýä, keramikaçylary bilen meşhurlyk gazanan kiçiräk Bursa şäherine göçüp gelýär. Ýetginjek ussatlaryň elinden çykýan owadan zatlara haýran galýar. Onda toýundan bir zatlar ýasamak höwesi döreýär. Ibrahim keramiki önümleri ýasamagyň syrlaryny öwrenmäge başlaýar we iň gowy toýun almak, gruntlamak, reňk, syrça çalmak boýunça dürli synaglary geçirýär. Wagtyň geçmegi bilen ol öz usulyny döredýär. 33 ýaşynda hususy firmasyny açýar we diňe bir Türkiýede däl, eýsem Awstriýada, Norwegiýada, ABŞ-da, Meksikada meşhurlyk gazanýar.

Serginiň açylşyna bagyşlanan dabarada aýdan gutlag sözünde Ibrahim Kuşlu: - Türk halkynyň medeni däplerini ýaýmagy öz wezipäm hasaplaýaryn – diýdi.

Haýwanlaryň sekillerini keramika işlerine salmagy türk ussadynyň döredijiliginiň aýratynlygydyr. Onuň eserlerinde gaplaňlaryň, itleriň, towşanlaryň, keýikleriň we beýleki haýwanlaryň şekili duş gelýär. Ibrahim Kuşlunyň işlerinde gyzyl we çal reňkiň öwüşginleri agdyklyk edýär.

Sergi 17-nji dekabra çenli dowam eder.