Türkmenistanyň Mejlisiniň wekiliýeti Ýerewanda ÝHHG PA güýzki sessiýasyna gatnaşdylar.

Ýewropada Howpsuzlyk we Hyzmatdaşlyk guramasynyň Parlament Assambleýasynyň (ÝHHG PA) güýzki sessiýasy «ÝHHG çökgünlik döwründe: içerki we daşarky meselelere täsir etmekde assambleýanyň orny» şygary astynda 2023-nji ýylyň 18-20-nji noýabrynda Ýerewan şäherinde geçirildi.  

ÝHHG agza döwletleriň 57-sinden 300 golaý wekiliýet, şol sanda Türkmenistandan wekiliýet bu guramanyň Parlament Assambleýasynyň mejlisine gatnaşmak üçin Ermenistana geldi.

 «Howpsuzlyk meselesini çözmek: Gapma-garşylyklar döwründe ÝHHG orny» sessiýasynda çykyş etmek bilen Türkmenistanyň wekiliýeti Türkmenistanyň Prezidenti Serdar Berdimuhamedow tarapyndan BMG-niň Baş Assambleýasynyň 78-nji sessiýasynda öňe sürlen başlangyçlary beýan etdi.

Şeýle halkara başlangyçlaryň birinjisiniň dünýäniň möhüm ýagdaýlaryny hasaba almak bilen, BMG Tertipnamasynyň kadalary esasynda Ählumumy howpsuzlyk strategiýasyny işläp taýýarlamak mümkinçiligini ara alyp maslahatlaşmakdan ybaratdygy bellenildi.

Türkmenistan tarapyndan öňe sürlen başlangyçlaryň ikinjisi bolsa      BMG-niň howandarlygynda Merkezi Aziýada we onuň bilen ýanaşyk zolaklarda Howpsuzlyk boýunça maslahaty döretmek başlangyjydyr. Maslahatyň maksady Merkezi Aziýa ýurtlaryny we dünýä bileleşigini ýakynlaşdyrmaga gönükdirilen çemeleşmeleri we çözgütleri işläp taýýarlamakdan ybaratdyr.

Türkmenistanyň wekiliýeti çykyşynyň ahyrynda bu teklipleriň ÝHHG PA agza-döwletleri tarapyndan goldaw tapjakdygyna ynam bildirdi we Türkmenistanyň bitaraplyk we parahatçylyk söýüjilikli syýasaty esasynda parlament hyzmatdaşlygyny mundan beýläk hem ösdürmäge taýýardygyny belledi.