Ermenistan Respublikasynyň Saglygy goraýyş ministrliginden wekiliýet Türkmenistandaky Halkara maslahata gatnaşdy

Ermenistan Respublikasyny Saglygy goraýyş ministrliginiň Baş sekretary Wardanuş Grigorýan Aşgabat şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahata gatnaşdy.

W.Grigorýan özüniň mähirli kabul edilendigi üçin minnetdarlyk bildirdi we çagalaryň saglygyny goramak ýaly iňňän möhüm meselä bagyşlanan şeýle ýokary derejeli foruma gatnaşmagyň özi üçin uly hormatdygyny belledi.   

Bellenilip geçirilişi ýaly, çagalaryň saglygyny goramak her bir döwlet üçin ileri tutulýan ugurlaryň biridir. Sebäbi jemgyýetiň geljegi ösüp barýan nesil bilen aýrylmaz baglynyşyklydyr.

Eneligi we çagany goramak – diňe bir saglygy goraýyş ulgamyn degişli bolan mesele bolman, eýsem sosial-ykdysady we medeni çygyrlary hem öz içine alýan köptaraply meseledir. Şunuň bilen baglylykda bu çygyrda alnyp barylýan işlere
uly ähmiýet berilýär we köp tagallalar edilýär.

Ermenistanda enäniň we çaganyň saglygyny goramaga gönükdirlen soňky döwlet maksatnamalaryny tanyşdyrmak bilen W.Grigorýan dermanlaryň elýeterli bolmagynyň aýratyn möhümdigini belledi. «Ermenistanda ýylsaýyn keselleriň sanynyň artmagy bilen, döwlet çagalara gymmat bahaly dermanlary muzdsuz berýär. Bu kesellere esasy immunoýetmezçiligini, ýetginjek rewmatoid artridini, Kawasaki sindromyny, ýaýran sklerozy we ş.m. degişli etmek bolar» - diýlip Ermenistanyň Saglygy goraýyş ministrliginiň saýtynda habar berilýär.

Çykyşyny jemlemek bilen W.Grigorýan bu halkara forumynyň netijeleriniň çagalaryň saglygyny goramak çygrynda täze gurluşlary döretmäge ýardam etjekdigini belledi we Türkmenistan döwletine bu başlangyçlarda uly üstünlikler arzuw etdi.

Haýyr-sahawat gaznasynyň Wise-prezidenti O.Atabaýewa Ermenistanyň wekiliýetine mazmunly çykyşy üçin minnetdarlyk bildirdi we häzirki wagtda dostluk, birek-birege hormat goýmak, ynanyşmak ýörelgelerine esaslanýan türkmen-ermeni gatnaşyklarynyň üstünlikli ösdürilýändigini belledi.

Ermenistanyň wekiliýetiniň Aşgabada saparynyň çäklerinde Türkmenistanyň Saglygy goraýyş we derman senagaty ministrliginde duşuşygy boldy.

Ermenistanyň Saglygy goraýyş ministrliginiň saýtyndaky maglumata laýyklykda, Türkmenistanda hem-de Ermenistanda öndürilýän derman serişdeleriniň we lukmançylyk ähmiýetli önümleriň importy we eksporty çygrynda hyzmatdaşlygy ýola goýmak hakynda ylalaşyga ýetildi. Şol bir wagtda türkmen tarapy şu yylyň güýz aýynda Aşgabat şäherinde geçiriljek halkara farmasewtika sergisine ermeni wekiliýetini gatnaşmaga çagyrdy