«TÄZE SABA» HJ-NYŇ ŞAHSY GIGIÝENA ÜÇIN ÖNÜMI

«Täze saba» hojalyk jemgyýeti Ahal welaýatynyň Gökdepe etrabyndaky döwrebap önümçilginde diş çotgalaryny öndürip başlady. Önümçiligiň ähli tapgyry doly awmotlaşdyrylan zawodda her minutda 25 çotga çykarylýar.

Telekeçiler Awstriýanyň we Germaniýanyň öňdebaryjy haryt öndürijlerinden alnan enjamlarda günde ýigrimi bäş müňe golaý dişe ideg edýän çotga öndürýärler.

Kärhanada öndürilen haryt islegli önüme öwrüldi. Telekeçiler diňe ýurdumyzyň özünde aýda 100-150 müň önüm ýerleýärler. Muňa Merkezi Aziýada taýy bolmadyk enjamyň ulanylmagy, gelşikliligi we olaryň kesel dörediji bakteriýalaryň köpelmegini aradan aýyrýan sintetiki materiallardan ýasalmagy ýardam edýär. Önümçilikde Gyýanlydaky polimer zawodyndan polipropilen, Italiýadan neýlon tüý we BAE-den alnan reňkler ulanylýar. Galyberse-de, ol daşary ýurtlardan getirilýänlerden 10 esse arzan.

-Diňe «Bagtyýarlyk» söwda merkezinde her hepdede müňe golaý diş çotgasy satylýar- diýip, kärhananyň direktory, Türkmenistanyň Senagatçylar we telekeçiler birleşmesiniň agzasy Nazar Ýazgylyjow gürrüň berýär. – Biz her aý Russiýa Federasiýasyna, Gazagystana we Özbegistana 200-250 müň çotga eksport edýäris. Azerbaýjana ibermek üçin hem bir tapgyr önüm taýýar edildi. Bu ̶ işiň ýaňy başy.

Häzirki wagtda biz halkara derejeli sertifikatlary almak (ISO 9001-2015, ISO14001-2015 we ISO 45001-2018) ugrunda iş alyp barýarys, ol «Türkmenistanda öndürildi» belgili önümimizi diňe bir Ýewropa ýurtlaryna däl, eýsem ABŞ-a hem eksport etmäge mümkinçilik berer.

Ýakyn wagtda biz tutuş sebiti önümimiz bilen üpjün etmegi göz öňünde tutýarys, munuň üçin diş çotgalarynyň birnäçe görnüşini, şol sanda çagalar üçin çotgalary, firma diş pastasyny we beýleki önümleri öndürmek gerek.