Türkmenistanyň kino sungatyny Kazan şäherinde geçiriljek kinofestiwalynda görkezerler

2025-nji ýylyň 5 – 9-njy sentýabry aralygynda Tatarystan Respublikasynyň paýtagty Kazan şäherinde «Altyn minbar» atly 21-nji Kazan halkara kinofestiwaly geçiriler. Bu abraýly kinofestiwalda Oguzhan adyndaky «Türkmenfilm» birleşiginiň iki – «Daragt» atly çeper filmi we türkmen-özbek bilelikdäki «Magtymguly Pyragy» atly çeper filmi görkeziler.

Türkmenistanly režissýor Sahysalyh Baýramowyň «Daragt» (2023 ý.) atly çeper filmi Beýik Watançylyk urşunda gazanylan Ýeňşiň 80 ýyllygyna bagyşlanyp gurnalan «Ýadynyň täsiri bilen» atly bäsleşikden daşary ýörite maksatnama girizildi.

Filmiň baş keşbi Näzigiň ykbaly barada aýdýar. Näzigiň adamsy meýletin fronta gidýär, ol bolsa uzak ýyllaryň dowamynda onuň.dolanyp gelmegine garaşýar. Adamsy gitmezinden öň eken agajy gurap galsa-da, Näzik ony suwarmagy dowam etdirýär we ýagty geljege bolan ynamyny ýitirmeýär.

Türkmen we özbek kino ussatlarynyň bilelikde döreden filmi «Russiýa – Yslam dünýäsi» atly bäsleşikden daşary maksatnamanyň çäginde tomaşaçylara hödürlener. «Magtymguly Pyragy» (2024 ý.) atly çeper filmi XVIII asyryň ortalaryna ýaşap geçen beýik türkmen şahyrynyň we akyldarynyň ömrüne we döredijiligine bagyşlanandyr. Eser Magtymguly Pyragynyň doglan gününiň 300 ýyllygyna bagyşlanyp, onuň özbek topragynda ýaşan döwürlerini, Buharadaky Kukeldaş medresesinde hem-de Hywadaky Şergazy-hana medresesinde bilim alýan döwrüni giňişleýin açyp görkezýär. Filmde şahyryň ömrüniň beýleki möhüm pursatlaryna hem aýratyn üns berilýär.

Geljekki ýyl milli kinematografiýanyň 100 ýyllygyny bellejek Oguzhan adyndaky «Türkmenfilm» birleşigi halkara derejeli çärä gatnaşmagy özüniň döredijilik işiniň ähmiýetiniň ykrar edilmegi hem-de belent hormat hökmünde garalýar.

Ýaňy-ýakynda Astrahan şäherinde geçirilen Hazarýaka ýurtlarynyň X mediaforumynyň baýramçylyk mejlisinde «Magtymguly Pyragy» atly çeper filmi tomaşaçylara hödürlendi. Bu forum Russiýadan, Gazagystandan, Eýrandan, Özbegistandan hem-de Türkmenistandan kino sungatynyň wekillerini bir ýere jemledi. Özbegistanly döredijiler – režissýor Muzaffarhon Erkinow, operator-oýun goýujy Rawşan Mirzakamalow we aktýor Behzod Mirzaýew — filmi surata düşürilişiniň tapgyrlary hem-de hyzmatdaşlyk meseleleri barada giňişleýin gürrüň berdiler.

Türkmenistanyň Telewideniýe, radiogepleşikler we kinematografiýa baradaky döwlet komitetiniň halkara gatnaşyklary bölüminiň baş hünärmeni Amangeldi Ataýewiň bellemegine görä, «Magtymguly Pyragy» atly filmiň bilelikde taýýarlanylmagy diňe bir Türkmenistanyň we Özbegistanyň arasynda medeni gatnaşyklary pugtalandyrmak bilen çäklenmän, eýsem, bilelikdäki taslamalaryň üstünlikli durmuşa geçirilmeginiň aýdyň mysaly boldy.